1 هو اللي شبه المطمورة فالشكل و غرقوا ما يتعداش يا ناس شبر ، و اللي طاح فيه وقت الخدمة يوحل، عندوا يا ناس فم و أذن و رجل ، مولات الدار بيه شغلها يكمل، كل مطبخ بيه يفخر، ما تحتاج عليه تسول راه عندك فالدار تلقاه معنكر، و اللي بغا يعرفو يسول التومة و الحنة و القزبر. أشنو هو ؟
2 هي اللي كتمشي بلا رجلين و تدوي بلا لسان و لا اشارة، تدي و تجيب خبار اخرين و تعطيك النعت و الإمارة، فكل بلاد يا ناس تسارى، على وحهها وشمة على اليمين، متمورة يا ناس غاية التمارة، أكيد حلها ساهل باليقين، و باينة يا ناس بصارح العبارة. شكون هي؟
3هي اللي عطية من الرحمان و موجودة يا للا و يا سيدي عندك و عندي، غالية يا ناس ماليها ثمن، بها تبلغ فالدنيا قصدك، تديك يا للا و يا سيدي لأبعد مكان بلا ما تحرك و لا تبدل جهدك ، هيا و اختها ديما جيران "ن" بنقطة فوقها تسعدك، كاتحل و تسد كيف البيبان ، حياني الى بدات في النقصان تخليك جالس فالركنة وحدك . أشنو هي؟
4 هو اللي كيشبه الكركوبة ، و فالخلاء موجود غير مهيف، شكلو يا ناس عجوبة، هبيل و خطواته مقلوبة، فكل مكان تلقاه مبيت، على ظهرو خطوط مكتوبة، الحي فيه كيجر الميت، عندو قرينات ديما منصوبة بيها كيسمع و يتصنت ، السدرة عندو هي المحبوبة، و من ورقتها يا ناس كيتقوت. شكون هو؟
5 هو اللي فحجمو غير صغير ، في ظروف الحياة كبير ، ديما يا ناس على بال، معتارفين بيه نساء و رجال، عندو عين وحدة لاغير، و سنينات كثار و قلال، يخدم خدماتوا بالتقدير، و يدور على اليمين و الشمال، حبيب الفقير و الغني على الزكروم ديما محتال، واضح و باين في التفسير، كيقوم لأجل العمال. أشنو هو؟
6 هو طير بصح كيطير، فالسماء و الأرض عندو عشو، هو بحال جميع الطيور، التراب ينبشو، هو الوحيد اللي ما يبيض بيض لا رقيق ولا غليظ، و كيولد ولادو من كرشو، كينعس بالنهار و كيسافر باليل، و جناحو بالندى كيترشو. شكون هو ؟
7 هو اللي مصاوب و معدل من الطين، وتفنن المعلم فشكلو، صنعو رقايقي بيدين، وردة معطرة جعلو، و دارلو طربوش زوين، و خلاه شهوة في العين، مغربي قالو أصلو، من مدينة سلا قالو شي بعضين، حتى احد ماينكر شغلو، بمدينة مراكش يا سامعين ذكرو الحاج حميد الزاهر (مطرب شعبي مغربي) فقولو. أشنو هو؟
8 هو اللي محبوب عند الناس، ومعروف جيد من الأجواد، شكلو يا ناس بديع، من قلبو كيرضع الأولاد، على راسو طربوش رفيع، و عندو جوج فام الأسياد، لخدمتو خاص ماء و ربيع، عليه الناس تجمع جميع في الأعراس و الأعياد و الأفراح. شكون هو؟
9 أنت فيها و ما تدخل ليها، موجودة فكل خيمة و دار، كتعجب الكبار و الصغار، ناس زمان قالو عليها أنقى من الزرع المختار، عمرها تكذب على ماليها، كتعطيهم صحة الأخبار، قدامها نوقفوا اوقات كثار، تلقاها الى فكرت فيها حلها ساهل و بكل اختصار. شكون هي؟
10 هي اللي محبوبة في العالم و تعجب صغار و كبار، معشوقة في سائر الأيام ، عندها عشاق و رواد كثار، كركوبة كتموت على الأرقام، و بأرقامها كيفرحوا أنصار، فين ما أرسلتيها كتمشي يا سلام، صبارة و ما ليها فم العار ، شادين فرسانها ديما الحزام، و يقوموا يا ناس بأعظم الأدوار، ربايعها يهزوا ليها الأعلام ، و ينطقوا ديما بأصوات كشعار. أشنو هي؟
